Berisha voton për primaret: Ditë e rëndësishme për pluralizmin politik e lirinë

Kryetari i PD, Sali Berisha ka votuar mesditën e kësaj të shtune, për të zgjedhur kandidatin e tij preferencial në kuadër të procesit të Primareve që po zhvillohen në Partinë Demokratike.

Ai tha se primaret janë një ditë e rëndëishme jo vetëm për Partinë Demokratike, por dhe për pluralizmin politik në Shqipëri dhe për lirinë.

“Një përshëndetje të përzemërt të gjithë demokrateve dhe demokratëve që kanë votuar dhe do votojnë sot për të shprehur vullnetin e tyre për kandidatin që ata dëshirojnë t’i përfaqësojë në parlamentin e Shqipërisë.

Kjo është një ditë e rëndësishme për PD, është një ditë e rëndësishme për pluralizmin politik në Shqipëri dhe për lirinë.

PD prin në betejën e saj për liritë dhe të drejtat e anëtareve dhe anëtarëve të saj, e qytetareve dhe qytetarëve të Shqipërisë. Ktheni pak kokën, mbyllni pak sytë dhe shihni se çfarë ndodh në partinë tjetër. Se në çfarë kthetrash, çfarë honesh vidhisen në këtë periudhë. Ndaj dhe, ky është një akt shprese për shqiptarët që liria nuk do të shuhet kurrë në këtë vend, por do dalë shumë më e fortë nga këto zgjedhje.

Shumë të vështirë, sepse kishte kandidatura aq konkurruese, sa ishte e vështirë ta përqendroje vendimin tek një e veçantë. Do të doja të ishin disa, por unë respektova statutin”,-tha Berisha.

LEXONI GJITHASHTU:

• U tërhoq nga kandidimi në PD, Ferdinant Xhaferaj: Janë çereknare, jo primare
• Kandidon në primare, Oriela Nebijaj: Proces demokratik, ndezim motorët për fushatë