Bërnabiq: Kërkesa e Kosovës për t’u bërë mysafire speciale, jashtë axhendës së KiE

Kryetarja e Kuvendit të Serbisë, Ana Bërnabiq ka thënë se aplikacioni i Kosovës për status të mysafirit special në Këshill të Evropës është tërhequr nga agjenda.

Sot në nisje të seancës të Kuvendit të Serbisë, Bërnabiq u tha deputetëve se “delegacioni serb në Këshill të Evropës ka arritur të heqë nga rendi i ditës kërkesën e Kosovës për statusin e mysafirit special në KiE”.

Më tej Kryetarja e Kuvendit të Sërbisë, ka shprehur mirënjohjen ndaj shteteve që e mbështetën heqjen e kësaj pike nga rendi i ditës.

“Mirënjohje e madhe për miqtë tanë nga Spanja, mirënjohje e madhe për miqtë tanë nga Partia Popullore Evropiane (EPP), të cilët na ofruan mbështetje në mënyrë që ta kishim shumicën për të arritur ta heqim këtë pikë nga rendi i ditës i komitetit politik të Asamblesë Parlamentare të Këshillit të Evropës”, tha Bërnabiq.

Kosova dështoi të anëtarësohet në Këshillin e Evropës në fillim të vitit 2024, për shkak se u kushtëzua me Asociacionin e komunave me shumicë serbe në Kosovë.

Vitin e kaluar, Serbia kishte formuar grup punues për koordinimin e aktiviteteve të autoriteteve shtetërore kundër pranimit të Kosovës në Këshillin e Evropës.

Këshilli i Evropës është organizatë lidere në mbrojtjen e të drejtave të njeriut. Anëtarësimi eventual do t’i ndihmonte Kosovës, mes tjerash, në fushën e sundimit të ligjit, dhe luftimin e korrupsionit.

LEXONI GJITHASHTU:

• Kosovë, përfundon numërimi i votave me postë, ja si votoi diaspora
• Rutte dhe ambasadorët e NATO-s pritet ta vizitojnë Kosovën