BERZH ul parashikimin për vitin 2023: Rritja ekonomike në Shqipëri do jetë 2.5%

Banka Europiane për Rindërtim dhe Zhvillim pret që rritja ekonomike këtë vit në Shqipëri të jetë 2.5%.

Ndryshe nga muaji shtator, parashikimi është ulur me 0.5 pikë përqindje sot. Rritja në vitin 2023 reflekton kërkesën e dobët të jashtme, inflacionin e vazhdueshëm të lartë dhe kushtet e shtrënguara të financimit.

Edhe rajoni do të jetë në një trajektore të përafërt, me Malin e Zi që kryeson pritshmërinë me 3.3% dhe Maqedoninë e Veriut që e mbyll me 2%.

Ndërkohë, për vitin 2022, BERZH deklaron se ekonomia shqiptare u rrit me 3.7%.

Sipas raportit, prodhimi në rajonin e BERZH pritet të rritet me 2.1 për qind në vitin 2023 pasi çmimet e larta të gazit dhe inflacioni i vazhdueshëm do të ndikojnë negativisht mbi perspektivën ekonomike.

Sa i përket konsumit, banka europiane thotë se ai ishte i qëndrueshëm në shqipëri dhe rajon, edhe pse cmimet e larta e frika për rritjen e mëtjeshme të tyre ishte e pranishme tek familjet.

Konsumi u rrit në vendin tonë, gjatë muajve të verës, nxitur edhe nga numri i madh i tursitëve që vizituan Shqipërinë dhe rajonin në përgjithësi.

Në vitin 2024, BERZH pret që ekonomia të rritet 3.3%.