Biden: Ende herët për të thënë nëse Rusia po kryen krime lufte

Presidenti i Shteteve të Bashkuara, Joe Biden, deklaroi të mërkurën se “është e qartë” që Rusia po sulmon civilë në mënyrë të qëllimshme, por ngurroi t’i cilësonte si krime lufte.

I pyetur nëse mendon se Rusia po kryen akte lufte në Ukrainë, ai tha: “Po e ndjekim situatën nga afër. Është ende herët për ta thënë këtë”.

Biden theksoi se ekziston ende mundësia e sanksionimit të eksporteve ruse të naftës, por duke minimizuar pasojat që kjo lëvizje do të shkaktonte në çmimin e naftës në SHBA dhe në botë.

Për sa i përket vendimit të presidentit ukrainas Volodomyr Zelensky për të qëndruar në vendin e tij pavarësisht rrezikut që i kanoset nga pushtimi rus, Biden u përgjigj se i takon Zelenskyt ta marrë këtë vendim.

“Unë mendoj se ai duhet ta gjykojë vetë këtë dhe ne po bëjmë çdo gjë që është e mundur për ta ndihmuar”, tha presidenti amerikan.

Zelensky ka thënë më herët se është shënjestra kryesore e Rusisë, e më pas familja e tij.

Shtetet e Bashkuara i kanë propozuar Zelenskyt të largohet nga Ukraina, ose të zhvendoset në Lviv, ofertë të cilën ai e ka refuzuar disa herë.

LEXONI GJITHASHTU:

• Ukraina kërkon përjashtimin e Rusisë nga Këshilli i Sigurimit në OKB
• Përditësime LIVE 2 mars: Mbi 2000 civilë të vrarë për 7 ditë në Ukrainë