Bie besimi në ekonomi, qytetarët dhe bizneset pesimistë prej 3 muajsh

Ka rënë besimi i qytetarëve dhe bizneseve për zhvillime pozitive në ekonominë e tyre. Në sondazhin e fundit të Bankës së Shqipërisë, përjashtim bën vetëm sektori i ndërtimit, ku e ardhmja shihet me optimizëm.

Treguesi i ndjesisë ekonomike ra me 1.6 pikë në muajin nëntor, duke shënuar nivelin më të ulët muajin e tretë radhazi pa rritje.

Sipas Bankës Qendrore, besimi në ekonomi është disa pikë mbi vijën e kuqe, por qytetarët dhe bizneset janë më pesimistë se 4 muaj më parë.

Në sondazhin e nëntorit, rënia u ndikua nga përgjigjet që dhanë qytetarët dhe bizneset e shërbimeve, tregtisë e industrisë. Në të kundërt, sektori i ndërtimit është optimist për të ardhmen.

Në vlerat që regjistron Banka e Shqipërisë, treguesi i ndjesisë ekonomike është 109.3 pikë, nga 100 që është niveli mesatar krahasimor.

Besimi i qytetarëve është në rënie, pasi ata nuk presin rritje të të ardhurave të tyre, nuk mendojnë të bëjnë shpenzime të mëdha dhe njëkohësisht i druhen rritjes së mëtejshme të çmimeve.

Edhe bizneset në tërësi nuk presin fitime madhore, teksa mendojnë se do të kenë një ecuri relativisht të qendrushme.

LEXONI GJITHASHTU: 

• Kreshnik Spahiu: Greqia nuk e gjunjëzon dot Shqipërinë si në vitin ‘97
• Ministri i Jashtëm serb: Pse Vuçiç nuk e firmos planin franko-gjerman