“Bie” qeveria në Serbi, Vuçiçit i kërkohet shpërndarja e parlamentit

Qeveria serbe i dërgoi të hënën presidentit të Serbisë Aleksandër Vuçiç propozimin për shpërndarjen e parlamentit dhe shpalljen e zgjedhjeve të reja.

Në këtë mënyrë i hapet rrugë formalisht caktimit të datës së zgjedhjeve që pritet të jetë 17 dhjetori i këtij viti.

“Mbajtja e zgjedhjeve të reja parlamentare në rrethanat ekzistuese do të siguronte një shkallë më të lartë të demokracisë, duke ulur tensionet e krijuara midis opsioneve rivale në shoqëri, duke refuzuar gjuhën e urrejtjes dhe duke afirmuar të drejtën për të shprehur lirisht mendimet dhe pikëpamjet për çështje të caktuara politike, ekonomike dhe të tjera, përfshirë edhe afirmimin e mëtejmë të vlerave evropiane”, thuhet në një njoftim të qeverisë serbe, që udhëhiqet nga Partia Përparimtare serbe e presidentit Aleksandar Vuçiç.

Në propozim ndër të tjera thuhet se “kohët e fundit ka pasur kërkesa nga një pjesë e opinionit për shpalljen e zgjedhjeve të reja, të jashtëzakonshme për deputetë dhe se më 11 shtator 2023, një pjesë e partive politike opozitare i paraqitën një kërkesë të tillë presidentit të Serbisë”.

Këto do të jenë zgjedhjet e treta me radhë në tre vjet e gjysmë në Serbi.

Pushteti në Serbi është përballur me trysni në rritje nga opozita pas dy sulmeve masive në pranverën e këtij viti që lanë pas vetes 17 të vrarë duke nxitur zemërimin e publikut dhe protesta masive kundër qeverisë.

Paralajmërimi i zgjedhjeve të reja, ndodhë në një periudhë përpjekjesh diplomatike perëndimore për normalizimin e marrëdhënieve Kosovë – Serbi, mes tensioneve që pasuan një sulm të një grupi serbësh të armatosur ndaj policisë së Kosovës me 24 shtator.

Krahas zgjedhjeve parlamentare Vuçiç ka provokuar zgjedhje edhe në shumicën e njësive vendore. Ai ka thënë se kryetari i Kuvendit të Serbisë fillimisht do të shpallë zgjedhje në më shumë se 60 njësi të vetëqeverisjes lokale, e më pas do të shpallen zgjedhjet krahinore.

LEXONI GJITHASHTU:

• “Më sulmojnë se kam buzë të shëmtuara”- Vuçiç: Fahri Musliu s’është babai im
• Këta janë tre ministrat shqiptar në Qeverinë e Malit të Zi