Marrëveshja e socialistëve dhe demokratëve për reformën zgjedhore, përfshinte ndër të tjera edhe zgjerimin e votimit dhe numërimit elektronik në 5 qarqet më të mëdha të vendit.

Kjo formë që garanton rezultat të shpejtë do të mbulonte gati 80 % të mandateve parlamentare, duke dhënë në një kohë rekord informacion mbi fituesin e zgjedhjeve.

Por palët politike ranë vonë dakord për këtë pikë, me opozitën e cila hezitonte dhe që ende nuk i ka shuar të gjitha dyshimet për këtë metodë.

Shoqëruar edhe me faturën e lartë prej 35 milionë eurosh që duhet ta paguajë qeveria, gjërat tashmë kanë ndryshuar.

KQZ, duke marrë në konsideratë kohën e ngelur dhe kostot, si dhe besimin e palëve në këtë proces, është duke biseduar me mazhorancën dhe opozitën për të gjetur një rrugë të mesme.

Propozimi është që elektronika të mos përfshihet në 5 qarqe, por në 3, sidomos në ato tre zona që janë përcaktuese për rezultatin, si Tirana, Durrësi dhe Elbasani.

Megjithëkëtë do të jetë dialogu ndërpartiak ai që do të vendosë në fund fare.

Votimi e numërimi elektronik u testua në vitin 2021 vetëm për njësinë numër 10 në Tiranë, si dhe në zgjedhjet lokale u përdor në bashkitë Elbasasn, Vorë dhe Kamzë.

Kjo do të jetë hera e parë do të provohet votim e numërim elektronik në të gjithë qarkun.

Vënia e KQZ-së nën hetim për tenderin e kompanise SMARTMATIC që po ofron këtë shërbim teknologjik, nuk është një shqetësim për palët në këtë proces për të ecur përpara në këtë drejtim, me po të njëjtën firmë.

LEXONI GJITHASHTU:

• Begaj dekreton Kodin e ri Zgjedhor: Nuk kam tagër të mbaj qëndrim për listat
• Kodi zgjedhor, hiqet e drejta e krerëve të partive për të kandiduar në disa qarqe