Bileta e fundit për në Europë, Vllaznia pret Skëndërbeun

Vllaznia do të luajë pasditen e së shtunës në stadiumin “Loro Boriçi” ndaj Skënderbeut të vendit të fundit, ndeshjen e rradhës për kampionat.

Në pamje të parë, konsiderohet një sfidë e lehtë, por trajneri Elvis Plori nuk e mendon kështu.

Sipas tij, edhe kjo sfidë duhet vlerësuar maksimalisht, ndonëse e ka pranuar që kjo përballje, por edhe ajo që vjen më pas me Dinamon, mund të jenë një mundësi frymëmarrje për skuadrën e tij.

“Nuk ka asnjë ndeshje të lehtë. Duhet vlerësuar maksimalisht duke ditur ecurinë që kemi bërë gjatë këtyre javëve. Në 5 javët e fundit kemi 2 humbje dhe 3 barazime, po shënojmë pak. Duhet ta vlerësojmë maksimalisht dhe të jemi shumë seriozë në fushën e lojës”, tha trajneri i Vllaznisë, Elvis Plori.

Nëse arrihet, kjo do të jetë fitorja e parë e Vllaznisë nën drejtimin e Plorit. Vetë ai e ka pranuar se ndjehet keq nga një situatë e tillë e krijuar, por ka besimin se gjërat do shkojnë mirë deri në fund.

“Me shumë se unë askush nuk e do që të fitojë. Kemi bërë një punë të mirë që kemi arritur finalen e Kupës me Partizanin ku ishte një ndeshje që kishte emocionet e veta. Shpresoj që edhe në ndeshjet e tjera të ndihemi mirë ashtu si në ndeshjen me Partizanin”, u shpreh ai.

Ndeshja Vllaznia-Skënderbeu e vlefshme për javën e 31-të të Kategorisë Superiore, do të luhet të shtunën në orën 16:45 në stadiumin “Loro Boriçi” dhe ekipi shkodran e sheh si mundësinë e fundit për të qëndruar në garën që e çon në Europë përmes kampionatit.

LEXONI GJITHASHTU

• Napoli shfaq interes për mesfushorin shqiptar
• Futbollistë të Kosovës marrin pasaportë shqiptare