Bizneseve u refuzohet kredia, çmimet e larta frenojnë huatë bankare

Bizneset kërkojnë të rritin investimet, por po përballen me mungesë financimi.

Vrojtimi i Aktivitetit Kreditues për tremujorin e parë të këtij viti tregon se rritja e çmimeve ka bërë që bankat të tregohen të kujdesshme në miratimin e kredisë për sipërmarrësit.

Refuzimet e kredive kanë ndodhur në masë për zinxhirin e bizneseve të vogla dhe të mesme.

Kjo kategori përbën  98.8% të totalit të kompanive në vend.

Raporti i huave të refuzuara  ka arritur në të njëjtët nivele me ato të gjysmës së parë të vitit 2020, periudhë kur aktiviteti ekonomik u bllokua për shkak të pandemisë.

Faktori kryesor që ka shtrënguar kredidhënien është mos përmbushja e kriterit të aftësisë paguese për shkak të rritjes së çmimeve.

E kundërta ka ndodhur me biznesin e madh. Kredia për këtë kategori u rrit në fund të shkurtit duke arritur në 100 milion euro. Pjesa më e madhe shkoi për tregtinë me shumicë, ndërtimin dhe industrinë përpunuese.