BKH dhe SPAK në Elbasan, angazhohen në monitorimin e fushatës zgjedhore

Agjentë të Byrosë Kombëtare të Hetimit dhe prokurorë specialë të SPAK kanë zhvilluar sot një operacion në qytetin e Elbasanit, ku janë angazhuar për të monitoruar fushatën zgjedhore.

Sipas informacioneve, ky operacion ka për qëllim kontrollin e rreptë të procesit zgjedhor në këtë qark, duke përfshirë mbështetje nga OSBE, Shërbimin Informativ Shtetëror (SHISH) dhe Agjencinë e Inteligjencës Financiare.

Të gjitha këto struktura janë vënë në gatishmëri për të garantuar një proces të pastër zgjedhor, duke monitoruar çdo tentativë për abuzim, përfshirë lëvizjet e kandidatëve për deputetë dhe aktivitetet e mbështetësve të tyre. Agjentët e BKH dhe SPAK janë duke përdorur teknologji të avancuar për të dokumentuar çdo shkelje të mundshme të rregullave zgjedhore.

Për këtë operacion është angazhuar prokurori Ols Dado, i cili është në krye të grupit të monitorimit dhe po ndjek nga afër zhvillimet në terren. Kjo veprimtari ka për qëllim të sigurojë se procesi zgjedhor i 11 majit të vitit 2025 zhvillohet pa asnjë ndikim të jashtëligjshëm, duke kontrolluar përdorimin e burimeve publike, abuzimin me administratën, qarkullimin e parave të pista, ndikimin e krimit të organizuar dhe çdo tentativë për blerje votash.

Burime të afërta me hetimet bëjnë me dije se kjo nismë ka për qëllim garantimin e pastërtisë dhe integritetit të procesit zgjedhor, duke siguruar që çdo abuzim të zbulohet dhe të ndëshkohet në përputhje me ligjin.

LEXONI GJITHASHTU:

• Aksident në Qafë Thanë, del nga rruga autobusi me volejbollistet e Skënderbeut
• Aksident në Gjirokastër, shtetasi gjerman pasi përplasi këmbësoren 48-vjeçare