Bllokimi nga aksidenti, Pika kufitare e Qafë Thanës i rikthehet normalitet

Drejtoria Vendore e Kufirit dhe Migracionit në Korçë njofton se pika e kalimit kufitar Qafë Thanë është rikthyer në funksion normal pas një bllokimi prej afro dy ditësh.

Bllokimi kishte ndodhur për shkak të një aksidenti rrugor, ku një autobot me gaz u përmbys në rrugën pranë pikës doganore.

“Nga kontaktet e vazhdueshme me autoritetet e policisë kufitare të Maqedonisë së Veriut, është konfirmuar se aksi rrugor “Strugë-Qafë Thanë”, i bllokuar që nga data 30 dhjetor 2025, është zhbllokuar dhe qarkullimi i mjeteve dhe shtetasve po kryhet normalisht si në hyrje ashtu edhe në dalje të territorit të Republikës së Shqipërisë, duke respektuar procedurat standarde të verifikimit kufitar”, thuhet në njoftim.

Autoritetet falënderojnë qytetarët për durimin dhe mirëkuptimin gjatë periudhës së ndërprerjes dhe u bëjnë thirrje të ndjekin udhëzimet e policisë kufitare për një lëvizje të sigurt.