Ashtu si në të gjithë vendin, edhe pensionistet e Peqinit kanë rendur që ne ditët e para për të marrë shpërblimin që qeveria akordoi për festat e fundvitit.

Disa prej tyre shprehen se vështirësitë janë të mëdha dhe padyshim ky shpërblim nuk i ndihmon. Ka të tjerë që theksojnë se i gjithë shpërblimi do të shkoj vetëm për ilaçe.

“Po çfarë shpërblimi do na mjaftojë. Ne do marrim shpërblimin do blejmë ilaçe se për pula e për send nuk blihet gjë. Dy pleq jemi ne asnjëri për shoshoqin”, thotë një e moshuar.

“Jo mo ça i mjaftueshëm është, e di si është kjo punë; mbyll sytë hap dorën ça të japin merre fute ne xhep, s’ke ça bën. Unë dje isha spital, 120 mijë lekë mora ilaçe, kam punë prapë mbas 3 ditësh”, shprehet një tjetër.

Bonusi do të ndahet sipas vlerës së pensioneve mujore, kush merr më pak do të përfitojë më shumë. Megjithatë serish është i pamjaftueshëm. shprehet mosha e tretë.

Pensionistët kanë mundësi të tërheqin bonusin e fundvitit deri në 30 qershor të 2025, por duket se pjesa më e madhe e tyre e kanë të planifikuar shpenzimin e këtyre parave për festat e fundvitit.