Borrell informon liderët e BE-së për tensionet Kosovë-Serbi

Përfaqësuesi i lartë për politikë të Jashtme dhe Siguri i Bashkimit Evropian, Josep Borrell, do të informojë liderët e 27 shteteve anëtare të bllokut për tensionet e fundit mes Kosovës dhe Serbisë, në samitin që mbahet më 15 dhjetor në Bruksel.

Paraprakisht, situata në Kosovë, nuk kishte qenë e paralajmëruar të ishte në agjendë, shkruan REL.

“E dini se ditëve të fundit jemi përballur me probleme të mëdha në veri të Kosovës. E kam dërguar të dërguarin e posaçëm [të BE-së për dialogun Kosovë Serbi] Mirosllav Lajçak në rajon, në Prishtinë dhe Beograd, menjëherë pas takimit të ministrave të Jashtëm të BE-së. Do t’iu raportoj liderëve për situatën dhe do të kërkoj uljen e tensioneve dhe t’i kthehen dialogut, që është rruga e vetme për të siguruar perspektivë evropiane për Kosovën dhe Serbinë”, tha Borrell.

Më 13 dhe 14 dhjetor, Lajçak ka qëndruar në Kosovë dhe Serbi, dhe së bashku me të dërguarin e Shteteve të Bashkuara për Ballkanin Perëndimor, Gabriel Escobar, kanë kërkuar heqjen e barrikadave.

“Është absolutisht e nevojshme që këto probleme të ndalen. Barrikadat duhet të hiqen, të kthehet qetësia, të kthehen diskutimet. Diskutimet për propozimin që kemi vënë në tryezë për të gjetur një zgjidhje të përhershme të tensioneve mes Prishtinës dhe Beogradit”, tha Borrell.

LEXONI GJITHASHTU:

• Osmani: Veriu i Kosovës sfidë për shkak të pretendimeve territoriale të Serbisë
• Kreu i EULEX: Situata në Veri serioze, barrikadat të hiqen në mënyrë paqësor