Borrell konfirmon se Kosova dhe Serbia kanë pranuar një plan të ri për dialogun

Përfaqësues i Lartë i Bashkimit për Punët e Jashtme dhe Politikën e Sigurisë, Joseph Borrell, ka konfirmuar se Kosova dhe Serbia kanë pranuar një plan të ri për dialogun për normalizimin e raporteve.

Nga Gjermania aty ku po mbahet takimi i ministrave të Punëve të Jashtme të shteteve të G7-s, diplomati tha se të dyja palët tashmë dorëzuar komentet e tyre për këtë plan.

“Me përfaqësuesin tim të posaçëm, Mirosllav Lajçak, kemi punuar shumë për këtë. Pra, para verës ua kemi prezantuar planin të dyja palëve, Kosovës dhe Serbisë, në mënyrë që ato të kapërcejnë krizat e përhershme në të cilat kemi punuar dhe për të arritur një normalizim gjithëpërfshirës të raporteve të tyre. Kemi marrë përgjigje nga të dyja palët. Jemi duke i studiuar dhe mendoj se është një shkas i mirë që duhet të shfrytëzohet për të arritur normalizimin e raporteve ndërmjet Prishtinës dhe Beogradit”, tha Borrell.

Shefi i diplomacisë së BE-së po ashtu tha se në ditët në vijim do të analizojnë komentet që kanë marrë nga Prishtina dhe Beogradi.

Kosova dhe Serbia zhvillojnë dialog në Bruksel që nga viti 2011. Kosova kërkon që ky proces të përfundojë me një marrëveshje që do të kishte edhe njohjen reciproke, ndërkaq Serbia synon një “zgjidhje kompromisi”.

LEXONI GJITHASHTU: 

• Racizëm në parlamentin francez, deputeti-kolegut me ngjyrë: Kthehu në Afrikë
• BBC: Emigrantët shqiptarë po rekrutohen nga bandat në Britani