Borrell: Kosova dhe Serbia janë pajtuar mbi aneksin e zbatimit të marrëveshjes

Pas përfundimit të takimit 12-orësh në Ohër, shefi i Politikës së Jashtme të BE-së, Josep Borrell, ka zbuluar detaje nga arritjet e bisedimeve. Gjatë një konference për media, Borrell tha se Kosova dhe Serbia janë pajtuar mbi aneksin e zbatimit të marrëveshjes për normalizimin e marrëdhënieve mes dy vendeve.  e normalizimit të marrëdhënieve mes tyre.

Sipas Borrell palët kanë rënë dakord që të zbatojnë të gjitha nenet e marrëveshjes së propozuar nga Bashkimi Evropian më 27 shkurtit në Bruksel.

“Kemi pasur një ditë të gjatë. Synimi i sotëm ishte që Serbia dhe Kosova të pajtoheshin mbi atë se si do ta zbatonin marrëveshjen e pranuar më 27 shkurt në Bruksel. Kjo do të thotë hapa praktikë mbi atë se çka duhet të bëhet dhe si. Kam kënaqësinë të them se pas 12 orësh kemi një marrëveshje dhe pajtim. Mund të deklaroj se Kosova dhe Serbia janë pajtuar mbi aneksin e zbatimit për rrugën e normalizimit të marrëdhënieve mes tyre. Si pjesë e këtij aneksi palët janë pajtuar që të zbatojnë të gjitha nenet e marrëveshjes dhe të implementojnë detyrimet e tyre në mirëbesim”, është shprehur ai.

Për sa i përket Asocacionit Borrell deklaroi: “Për nenin 7 – Kosova është pajtuar që të fillojë menjëherë, dhe kur them menjëherë, them menjëherë, negocimin për të vendosur aranzhimet dhe përgatitje për të siguruar një nivel të mirëfilltë të vetëmenaxhimit të komunitetit serb”.

Në nenin 7 flitet për formalizimin e statustit të Kishës Ortodokse Serbe e po ashtu për sigurimin e “një niveli të përshtatshëm të vetëqeverisjes”.

“Të dyja palët përkushtohen për arritjen e aranzhimeve specifike, në përputhje me instrumentet relevante të Këshillit të Evropës dhe duke përdorur përvojat ekzistuese evropiane, për të siguruar një nivel të përshtatshëm të vetëmenaxhimit për komunitetin serb në Kosovë dhe mundësinë për provizione të shërbimeve në disa fusha specifike, përfshirë edhe mundësinë e asistencës financiare nga Serbia dhe kanale të komunikimit direkt të komunitetit serb me Qeverinë e Kosovës. Palët do të formalizojnë statusin e Kishës Ortodokse Serbe në Kosovë dhe të ofrojnë nivel të lartë të mbrojtjes së trashëgimisë fetare dhe kulturore serbe, në përputhje me modelet ekzistuese evropiane”, thuhet në nenin 7.

Në përfundim Borrell tha se palët të cilat nuk respektojnë marrëveshjet do të përballen me pasoja.

LEXO GJITHASHTU:

• Kurti: Pajtimi për aneksin e zbatimit të marrëveshjes, njohje de-facto e Kosovës
• Vuçiç flet pas takimit në Ohër: Nuk nënshkruam asnjë dokument