Borxhi publik, Standard & Poor’s vlerëson stabilitetin ekonomik të Shqipërisë

Agjencia ndërkombëtare e vlerësimit të kreditit Standard & Poor’s Global Ratings ka rikonfirmuar për Shqipërinë vlerësimin afatgjatë “BB”, duke mbajtur të pandryshuar edhe perspektivën “të qëndrueshme”.

Ky vendim vjen si pasojë e stabilitetit makroekonomik që ka ruajtur vendi, disiplinës fiskale dhe rezervave të mjaftueshme valutore.

Sipas raportit, ekonomia shqiptare pritet të rritet me 3.6% gjatë vitit 2025, e mbështetur nga rritja e konsumit familjar dhe pagat reale më të larta. Për periudhën 2026–2028, S&P parashikon një rritje mesatare vjetore prej 3.5%.

Në lidhje me financat publike, agjencia vlerëson se pas zgjedhjeve parlamentare qeveria do të ruajë politika fiskale të kujdesshme. Deficiti buxhetor parashikohet të mbahet rreth 2% të PBB-së, ndërsa borxhi publik pritet të ulet gradualisht deri në 51% të PBB-së në vitin 2028.

Një tjetër element i rëndësishëm është procesi i anëtarësimit të Shqipërisë në Bashkimin Europian, që së bashku me flukset e investimeve private shihet si një garanci shtesë për qëndrueshmërinë ekonomike të vendit.

Standard & Poor’s thekson gjithashtu se përdorimi i kujdesshëm i burimeve, menaxhimi i mirë i borxhit dhe ruajtja e stabilitetit financiar do të jenë kyçe për të mbajtur këtë nivel vlerësimi në vitet në vijim.

LEXONI GJITHASHTU:

• Presidenti Begaj takim zyrtar me Orbanin në Hungari, në fokus ekonomia dhe integrimi
• Rusia imune ndaj sanksioneve, Kremlini reagon ndaj Trump: Ekonomia jonë funksionon