Britania e Madhe bashkohet me SHBA-në, nis sulmet ajrore në Jemen

Mbretëria e Bashkuar ka nisur sulme ajrore në Jemen, duke iu bashkuar fushatës intensive të SHBA-së kundër rebelëve Huthi, të cilët mbështeten nga Irani.

Ky është angazhimi i parë i ushtrisë britanike në këtë fushatë, e cila ka nisur më 15 mars, dhe ka për synim goditjen e pozicioneve të Huthëve që kërcënojnë sigurinë rajonale, duke përfshirë lirinë e lundrimit në ujërat e Detit të Kuq.

Sekretari i Mbrojtjes i Mbretërisë së Bashkuar, John Healey, shpjegoi arsyen e nisjes së sulmeve, duke theksuar se kërcënimi i Huthëve ndaj lundrimit ka shkaktuar një rënie të 55% të transportit detar përmes Detit të Kuq, një fenomen që ka sjellë humbje ekonomike të konsiderueshme dhe ka kontribuar në paqëndrueshmërinë rajonale. Healey shtoi se ky rrezik ka ndikime të drejtpërdrejta edhe për sigurinë ekonomike të Mbretërisë së Bashkuar.

Gjatë sulmeve ajrore, rebelët Huthi raportuan disa goditje në kryeqytetin Sana’a, që është nën kontrollin e tyre që nga viti 2014. Po ashtu, disa sulme të tjera goditën rajonin rreth Saada-s, bastionin e Huthëve në veri të Jemenit.

Operata “Rough Rider” ka për qëllim të godasë infrastrukturën e rebelëve, përfshirë ato që përdoren për prodhimin e dronëve, të cilët janë përdorur për të sulmuar anijet në Detin e Kuq dhe Gjirin e Adenit. Ministria e Mbrojtjes e Mbretërisë së Bashkuar tha se ndërtesat që u goditën ishin përdorur nga Huthët për prodhimin e këtyre dronëve, dhe ndodheshin rreth 25 kilometra në jug të Sanaas.

Kjo fushatë e re, e zhvilluar paralelisht me bisedimet ndërkombëtare mbi programin bërthamor të Iranit, tregon për përshkallëzimin e përpjekjeve të SHBA-së dhe aleatëve të saj për të frenuar ndikimin iranian në rajon dhe për të mbrojtur lirinë e lundrimit në ujërat e rëndësishme të Detit të Kuq.

LEXONI GJITHASHTU:

• Rebelët Houthis: Dhjetra emigrantë afrikanë u vranë në sulmet e SHBA-së në Jemen
• Rebelët Houthi: Sulmet e SHBA-së në portin e Jemenit kanë vrarë mbi 74 persona