Sekretari britanik i Mbrojtjes, John Healey, deklaroi të mërkurën në parlament se Marina Mbretërore ka gjurmuar një “anije spiune ruse” që kaloi nëpër ujërat e Mbretërisë së Bashkuar. Healey paralajmëroi presidentin rus Vladimir Putin me një mesazh të drejtpërdrejtë: “Ne ju shohim dhe e dimë se çfarë po bëni.”

Sipas sekretarik britanik, anija ruse Yantar (Amber) ishte duke u përdorur për mbledhjen e informacioneve të inteligjencës, për të hartuar infrastrukturën kritike nënujore të Mbretërisë së Bashkuar. Anija hyri në ujërat britanike të hënën, rreth 72 kilometra larg bregut të vendit, dhe u monitorua nga dy anije të Marinës Mbretërore.

“Ne e zbuluam atë duke u endur mbi infrastrukturën kritike nënujore të vendit tonë,” tha Healey. Ai shtoi se aktualisht, anija është në Detin e Veriut, duke kaluar përsëri nëpër ujërat britanike.

Një zyrtar francez konfirmoi për agjencinë e lajmeve AFP se burimet ushtarake franceze ishin mobilizuar gjithashtu për të monitoruar anijen Yantar. Sipas tij, ndonëse nuk është vërtetuar një synim armiqësor, mbikëqyrja e anijeve ruse është një praktikë standarde kur ato kalojnë pranë territorit të vendeve perëndimore.

“Ndodh rregullisht që anijet ruse të kalojnë nëpër këto ujëra dhe gjithmonë vendosen nën mbikëqyrje të rreptë,” tha zyrtari francez.

Ky është incidenti i dytë që përfshin anijen Yantar në ujërat britanike brenda pak muajsh, pasi ajo u zbulua për herë të fundit në nëntor. Sekretari Healey theksoi se Marina Mbretërore ka gjurmuar disa anije të marinës ruse në raste të ndryshme kohët e fundit.

Në fund të dhjetorit, fregata britanike HMS Somerset ndoqi një ekuipazh rus që po lundronte nga Deti i Veriut drejt Kanalit Anglez. Në shtator, anijet luftarake britanike kaluan një javë “duke monitoruar” katër anije ruse, ndërsa avionë të Forcave Ajrore Mbretërore (RAF) interceptuan avionë rusë pranë kufijve të Mbretërisë së Bashkuar.

RAF njoftoi se do të vendosë avionë në kuadër të një dislokimi të ri të NATO-s për të mbrojtur infrastrukturën kritike në Detin Baltik. Masat vijnë pas disa incidenteve të sabotazhit, përfshirë dëmtimin e kabllove nënujore të telekomit dhe energjisë.

Ekspertë dhe politikanë perëndimorë kanë akuzuar Rusinë për zhvillimin e një “lufte hibride” kundër vendeve të NATO-s, duke përfshirë këtu veprimtarinë në ujëra ndërkombëtare dhe sulme ndaj infrastrukturës kritike.

LEXONI GJITHASHTU:

• Trump: Rusia të ndalë luftën ose do përballet me sanksione. Koha për marrëveshje
• Scholz pas takimit me Macron: Mandati i Trump do të jetë një sfidë për Evropën