Britania e Madhe propozon armatosjen e Moldavisë: Ta mbrojmë nga Rusia

Moldavia duhet të pajiset me standardet e NATO-s që të jetë në gjendje të mbrohet nga një pushtim i mundshëm rus.

Kështu ka deklaruar sekretarja e Jashtme britanike, Liz Truss, e cila ka nënvizuar se Mbretëria e Bashkuar është në bisedime me aleatët për të ndihmuar vendet e vogla të vetëmbrohen.

Shefja e diplomacisë britanike deklaroi se ishte e qartë se pavarësisht suksesit modest në Ukrainë, presidenti Vladimir Putin vazhdon të ketë ambicie për të krijuar një Rusi të madhe.

Moldavia, dikur një republikë sovjetike, ndodhet në kufirin jug-perëndimor të Ukrainës. Ajo nuk është në kufi me Rusinë, por ndodhet pranë disa rajoneve që aktualisht janë të pushtuara nga trupat ruse.

Moldavia nuk është anëtare e NATO-s, edhe pse më pak se dy javë më parë, pas pushtimit të Ukrainës, aplikoi për anëtarësimin në BE.

Një nga vendet më të varfra të Evropës, Moldavia është gjithashtu shtëpi e shumë ukrainasve etnikë dhe ka pritur mbi 437 mijë refugjatë që nga fillimi i luftës.

Presidentja Maia Sandu është një lidere pro-evropiane, por paraardhësi i saj Igor Dodon, i cili ka ende shumë mbështetës, ishte pro-rus.

Nga ana e saj, Moska mbështet separatistët që kontrollojnë rajonin Transnistria, ku ka rreth 1.500 trupa.