Bukë me listë, qytetarët të zhytur në borxhe në dyqanet ushqimore

Rritja e çmimit të produkteve të konsumit po ndikon kryesisht në fshatra dhe në periferitë e qyteteve. Në periferitë e Tiranës lista e borxheve është shtuar.

Ekonomia e disa prej familjeve shqiptare është dobësuar deri në pikën sa edhe buka merret me listë.

“Njëri ka 2 milionë e 700 mijë lek, veç një bukë vjen e merr në ditë. Edhe bukën në listë. U kam dhënë se më vjen keq, si ta lë pa bukë”, shprehet një shitës.

“Marrim miellin e bukës, vaj oriz, sheqer. Kemi këtë shitësin këtu që na i jep njëherë me lek, njëherë pa lekë”, thotë një qytetare.

Kryesisht qytetarët blejnë me listë produktet bazë të shportës ushqimore. Vetëm shitëses Drita Troci në gjashtë vite, qytetarët i kanë rreth 14 milion lekë të vjetra borxh.

“Ja vetëm një familja ka 1 milion e 637 mijë lekë”, tregon shitësja.

Blerja me listë duket e pazakontë për kryeqytetin, por vetëm pak kilometra larg Tiranës, kjo është e vetmja mënyrë mbijetese.