“Burrë”, Edi Rama poston foton e Thaçit kur ishte për ta takuar babain e sëmurë

Kryeministri i Shqipërisë, Edi Rama, ka publikuar një fotografi të ish-presidentit të Kosovës, Hashim Thaçi, i cili ishte sot në Kosovë për të vizituar babain e tij, i cili po trajtohet në Qendrën Klinike Universitare të Kosovës (QKUK).

Në postimin e tij në Facebook, Rama e ka cilësuar Thaçin me fjalën “Burrë”, duke shprehur kështu respekt për ish-liderin kosovar gjatë kësaj vizite personale.

Pas tri herë refuzimesh, Gjykata Speciale ka miratuar kërkesën e ish-Presidentit të Kosovës, Hashim Thaçi, për t’u kthyer në Kosovë. Leja është dhënë për arsye humanitare, pasi babai i tij ndodhet në gjendje të rënduar shëndetësore.

Thaçi ka mbërritur në Prishtinë dhe ka vizituar babanë e tij, i cili po trajtohet në Klinikën e Mjekësisë së Brendshme në Qendrën Klinike Universitare të Kosovës (QKUK).

Gjatë vizitës, ai është shoqëruar nga forca të shtuara sigurie, siç parashikohet nga protokollet për rastet e tilla.

“Në përputhje me udhëzimet e trupit gjykues dhe gjykatëses së procedurës paraprake, është organizuar një vizitë nën mbikëqyrje për Hashim Thaçin, për të takuar babain e tij në Kosovë. Gjatë kësaj vizite, i akuzuari mbetet në paraburgim të Dhomave të Specializuara,” thuhet në njoftimin zyrtar të Gjykatës.

LEXONI GJITHASHTU:

• Hashim Thaçi mbërrin në Kosovë për të vizituar babanë e sëmurë
• Grenell për Thaçin: Duhet të ishte duke festuar në Prishtinë, jo pas hekurave