Bushati: Debati për presidentin tregoi se sa e përçarë është opozita

Analisti Andi Bushati thotë se debati për zgjedhjen e Presidentit të ri të Republikës, ka treguar se sa e përçarë është opozita.

Në emisionin “Shock” në “Euronews Albania”, Bushati u shpreh se brenda Partisë Demokratike, ka tre grupe parlamentare.

Sipas tij, është grupi që mbështet ish-kryeministrin Sali Berisha, grupi që mbështet kreun e Grupit Parlamentar Enkelejd Alibeaj si dhe grupi që është asnjëanës.

“Është një debat i madh që është zhvilluar prej disa ditësh në gjirin e opozitës. Ky është një debat njëkohësisht që po nxjerr se sa e përçarë është opozita. Ka një pjesë që do të negociojë me Ramën, por që nuk përfaqësojn kërkënd. Ka një pjesë tjetër që thotë me Ramën nuk duhet negociuar, por as kjo nuk tregon që të paktën mes deputetëve ka një kuorum. Sot pamë 17-18 deputetë që nuk ishin as në Kuvendin e Berishës, as ishin në mbledhjen e Alibeajt. Pra, pak a shumë midis deputetëve kemi 3 PD”, tha Bushati.

Ai shtoi se kryeministri Edi Rama e ka në mendje e tij emrin e presidentit të ri dhe proceset e nisura janë qesharake.

Ndërsa, analisti Baton Haxhiu se duhet të ketë negociata mes palëve edhe nëse janë kundërshtarë politikë.

“Qëndrimi politik i Sali Berishës është të refuzojë çdo gjë që vjen nga Edi Rama. Unë jam me parimin që me kundërshtarin politik duhet të negociohet”, tha ai.

LEXONI GJITHASHTU

• Debat në grupin e PD, deputetët të përçarë për Presidentin e ri
• 21 deputetë të PD i përgjigjen thirrjes së Alibeajt për mbledhje grupi