Për analistin Andi Bushati, mbledhja e nesërme e Kryesisë së Partisë Socialiste nuk do të jetë e rëndësishme, pasi sipas tij, presidenti i ri do të dalë nga ‘shtrati politik’ i kryeministrit Edi Rama.
Në emisionin “Shock” në “Euronews Albania”, Bushati u shpreh se e gjithë procesi që u zhvillua ishte një farsë.
“Besoj se nesër do hapen zarfet sekretë. Por, ashtu siç ishte para një muaji një lojë, edhe nesër Kryesia e Partisë Socialiste do të jetë një lojë. Presidenti i këtij vendi ashtu si shumë ministra të qeverisë, do të dalë nga shtrati politik i Edi Ramës. Mblidhet apo jo Kryesia e PS-së nuk është shumë e rëndësishme. Do kemi një njeri të vendosur nga Edi Rama”, tha Bushati.
Ndërsa, analisti Baton Haxhiu deklaroi se dihej që në fillim se Rama do ta zgjidhte vetë Kreun e ri të Shtetit, teksa shtoi se në mbledhjen e Kryesisë së PS-së, mund të dalin emra surprizë.
Partia Socialiste do të mbledhë kryesinë të premten në orën 17:00, ku ndër të tjera në axhendë është ecuria e procedurave të zgjedhjes së Presidentit të Republikës dhe vendimmarrja e kësaj force politike
Raundi i katërt për votimin e Presidentit të ri të Republikës do të zhvillohet më 4 qershor, ora 18:00 në Kuvend.
LEXONI GJITHASHTU
