Bushi zbulon listën për dy sfidat e ardhshme të Kombëtares U-21

Kombëtarja shqiptare e 21-vjeçarëve do të nisë përgatitjet për dy ndeshjet e radhës miqësore, ku do të testojë formën e lojtarëve ndaj Moldavisë dhe Ukrainës.

Trajneri Alban Bushi publikoi listën me futbollistët e thirrur, ku bie në sy se e vetmja risi është afrimi i mbrojtësit të Ballkanit të Kosovës, Diar Vokrri.

Në total janë 23 futbollistë, një ndërthurje e atyre që aktivizohen në ligën vendëse dhe pjesës tjetër që luajnë në skuadra të ndryshme në Evropë.

Tre portierë janë preferuar nga tekniku (Dema, Jukaj dhe Veliaj), 9 mbrojtës, 6 mesfushorë dhe 5 sulmues, përfshirë Maksuti nga Flamurtari dhe Toma nga Partizani.

Kombëtarja U-21 do të nisë grumbullimin këtë të hënë në Moldavi, aty ku do të zhvillohet edhe ndeshja e parë miqësore ndaj vendasve.

Duke qenë se Shqipëria është ndër vendet organizatore për Kampionatin Evropian, ekipi kuqezi luan vetëm ndeshje miqësore.

Gjatë vitit 2025 janë planifikuar 7 sfida të tilla, nga të cilat ekipi ka fituar vetëm 2.