Cenimi i të drejtave të njeriut në pandemi, juristët argumente pro dhe kundër

“Në raste të vështira, në raste siç është pandemia C0VID-19 këto lloj kufizimesh të të drejtave dhe lirive themelore janë të arsyeshme”.

Kështu u shpreh për emisionin “Mirëmëngjes” në Euronews Albania avokati Xhon Skënderi, teksa komentoi të drejtat e njeriut në pandemi dhe vaksinimin me detyrim.

Pedagogu i Fakultetit të Drejtësisë nënvizoi se “në raste kur respektohen kushtet procedurale dhe materiale të konventës për vaksinimin të detyrueshëm nuk ka shkelje të të drejtave të njeriut”.

Avokati sqaroi se kur një produkt është i certifikuar, mund të përdoret për qytetarët duke marrë parasysh aspektin ligjor.

“Ajo që e kundërshton idenë e shkaqeve urgjente dhe emergjencës së kësaj vaksine dhe refuzimit publik për ta pranuar, nuk pajtohet me kodin e Nuerbergut se ka provën klinike si vaksinë. Nuk jemi në kushtet e një eksperimenti, jemi në kushtet e një produkti të ceritifikuar”, u shpreh ai.

Ndërsa avokatja Megi Kurti tha se vaksinimi i detyrueshëm për një kategori personash të caktuar mund të jetë legjitim.

Pedagogia e juridikut deklaroi se nëse një çështje e caktuar shkon përballë gjykatës patjetër që i takon çdo shteti të vendosë.

Sipas saj duhet të ezaurohen të gjitha masat e tjera, derisa të shkohet tek vaksinimi i detyrueshëm

“Një problematikë që lind nga vaksinimi i detyrueshëm është që nëse ti e bën të detyrueshme, detyron personat që nuk kanë dëshirë ta bëjnë që të gjejnë mënyra të tjera për siguruar pasaportën e vaksinimit”, tha ajo.