Censusi i shpendëve, klima largon zogjtë nga vendi

Gjatë këtyre dy ditëve të fundit është zhvilluar censusi i shpendëve në Shqipëri. Në liqeni e Ohrit dhe të Prespës është vën re numër i ulët i shpendëve kjo për shkak të ndryshimeve të kushteve klimatike dhe dimrit më të butë krahasuar me vitet e mëparshme.

Gani Bego, specialisti i Agjencisë së Zonave të Mbrojtura tha se shpendët e vërejtur këtë vit janë të njëjtët me vjet dhe nuk ka ardhje të shpendëve të rinj.

“Nga të dhënat e para të grumbulluara nga cencusi, për shkak të klimës të butë pritet numër më i ulët i shpendëve. Shpendët zakonisht vijnë nga veriu i Europës, në qoftë se në veri dhe sivjet presim një numër me të ulët. Shpendët që kemi rastisur këtë vit janë të njëjtët me vjet, pra nuk ka shpendë të rinj, por numri është më i ulët”, tha Bego.

E njëjta situatë paraqitet dhe në liqenet e Prespës. Në numrin e ulët të shpendëve ka ndikuar dhe ulja drastike e nivelit të ujit në këto liqene.

“Dimri aktual këtë vit është më i butë ndërkohë numri i shpendëve është më i ulët ndërsa si numër llojesh është pothuajse i njëjtë. Si risi në fakt shohim edhe madhësinë e tufave, distancën e tyre me bregun e liqenit dhe shohim që ka disa ndryshime për shkak se në liqenin e Prespës kemi ulje drastike të nivelit të ujit, dhe kuptohet që pjesa e kallamishtave është shumë e rëndësishme si habitat”, tha Spase Shumka, profesor mjedisi.

Censusi i shpendëve zhvillohet për dy ditë rresht në 3 shtete, Shqipëri, Maqedoni e Veriut dhe Greqi të cilat lagen nga liqeni i Ohrit dhe i Prespës.