“Çështja McGonigal”, Meta thirrje SPAK-ut: Hetoni Edi Ramën

Kryetari i Partisë së Lirisë, Ilir Meta kërkon që drejtësia të nisë hetimet për kryeministrin Edi Rama, pasi sipas tij, është i implikuar në çështjen e ish-zyrtarit të FBI-së, Charles McGonigal.

Përmes një postimi në rrjetet sociale, Meta u shpreh se SPAK-u duhet të kishte nisur hetimet më parë , pasi ka komunikuar me drejtësinë amerikane për këtë çështje.

Sipas tij, çdo përpjekje e Ramës për t’ju shmangur të vërtetës, është një konfirmim i fajësisë së tij dhe tentativë e dëshpëruar për t’ju fshehur llogaridhënies së pashmangshme.

“Përballë fakteve shokuese, që zbulohen çdo ditë, drejtësia shqiptare duhet të nisë urgjentisht hetimet për Kryeministrin e implikuar drejtpërdrejt në aferën shumë të rëndë korruptive shtetërore “Mc Gonigal”.  SPAK duhet të kishte nisur me kohë hetimet shumë të thelluara përballë këtij skandali, që e ka shndërruar institucionin e Kryeministrit në një çerdhe korrupsioni, manipulimi dhe trafikimi mafioz të influencave duke korruptuar edhe zyrtarë të lartë si Mc Gonigal. SPAK duhet të vendosë një komunikim intensiv, serioz dhe shumë të ngushtë me institucionet e drejtësisë amerikane për të zbardhur deri në fund këtë skandal kaq të rëndë, në dritën e provave të pakundërshtueshme të zbuluara nga drejtësia amerikane.

Ky komunikim i SPAK me drejtësinë amerikane me qëllim zbardhjen e veprimtarisë antishterore dhe korruptive të Edi Ramës është një detyrim ligjor i pashmangshëm për të. Çdo përpjekje e Edi Ramës për t’ju shmangur përballjes me të vërtetën, përfshirë edhe hetimin parlamentar, për këtë aferë skandaloze korrupsioni është një konfirmim i fajësisë së tij dhe tentativë e dëshpëruar për t’ju fshehur llogaridhënies së pashmangshme. Asnjë shqiptar nuk mund të pranojë kurrë që të ketë një Kryeministër, zyra e të cilit është e inkriminuar deri në grykë me veprimtari të paligjshme në dëm të interesave më të larta të Shqipërisë dhe të shqiptarëve”, shkroi Meta në Facebook.

LEXONI GJITHASHTU

• ‘Tronditen themelet e politikës’ Baçi me deklaratë të fortë, Koçi: Furtunë politike!
• Manjani për skandalin me ish-zyrtarin e FBI: Rama do thirret në SHBA për të dëshmuar
• Genc Burimi: Rama duhet të hetohet në Shqipëri, ka emrin në një dosje jashtë vendit