Çfarë do të ndodhë më 6 dhjetor? Policia e ndalon protestën, PD nuk tërhiqet

Ku do të zhvillohet protesta e opozitës më 6 dhjetor? Kjo është dilema kryesore e politikës shqiptare në ditët e fundit. Partia Demokratike ka njoftuar se qytetarët më 6 dhjetor do të grumbullohen sërish para Kryeministrisë.

Por edhe këtë të enjte, drejtuesit e policisë i komunikuan përfaqësuesve të Partisë Demokratike që zhvillimi protestës në atë pjesë të bulevardit nuk do të jetë i mundur.

Por as ky paralajmërim i fundit i policisë nuk e stepi Berishën, që shprehu vendosmërinë për protestën e 6 dhjetorit.

“Liderët evropianë nuk janë si Edi Rama, liderët evropianë janë liderë të zgjedhur me votën e lirë të qytetarëve të tyre dhe ata e dinë se nga vota e lirë, buron shteti ligjor, liritë dhe të drejtat e qytetarëve. Gjithçka është në dorë të protestuesve dhe të organizatorëve, ne bulevardin nuk e lëshojmë”, theksoi Berisha.

Protestën e komentoi edhe Rama, që deklaroi se nuk do të negociohet asnjë standard sigurie për zhvillimin e samitit.

“Përsa i përket masave të sigurisë, ato nuk negociohen me askënd. Janë masa sigurie që vendosen, bazuar në të gjitha standardet dhe rregullate vendosura nga vetë Këshilli Evropian, kudo ku zhvillohen aktivitete kanë masa standarde, nuk janë çështje opinionesh, mendimesh, diskutimesh”, nënvizoi Rama.

Në protestën e opozitës më 6 dhjetor kanë konfirmuar pjesëmarrjen disa nga partitë aleate të PD, por duke theksuar se do të dalin në shesh kundër qeverisë dhe jo kundër Samitit.

LEXONI GJITHASHTU

• Berisha: Përshëndes Steinmeier, mirënjohje për kujdesin që tregoi ndaj Nishanit
• ‘Liderët evropianë s’janë si Rama’, Berisha për protestën: Bulevardin s’e lëshojmë
• Presidenti gjerman: Shqipëria, model për Europën dhe vendin tim