Çfarë ka ndodhur në 24 orët e fundit në Ukrainë dhe Rusi

Sot është dita e 76-të e luftimeve në Ukrainë që nga mëngjesi i 24 shkurtit, kur presidenti rus Vladimir Putin urdhëroi një “operacion ushtarak” dhe rusët nisën sulmet në të gjithë territorin e Ukrainës.

Tashmë, forcat ruse kanë përqëndruar sulmet e tyre në pjesën lindore të Ukrainës, ndërsa gjatë fjalimit të djeshëm në “Sheshin e Kuq” në Moskë, presidenti rus Vladimir Putin deklaroi se NATO përbën kërcënim për Rusinë.

Zhvillimet kryesore të 24 orëve të fundit:

• Putin ngjalli kujtimin e heroizmit sovjetik të kohës së luftës për të frymëzuar ushtrinë e tij që luftonte në Ukrainë, por nuk ofroi asnjë udhërrëfyes të ri drejt fitores dhe pranoi koston e jetës së ushtarëve rusë.
• Presidenti i Ukrainës, Volodimir Zelenski, në një deklaratë për përvjetorin e fitores, premtoi se ukrainasit do të triumfojnë, duke thënë: “Rruga drejt saj është e vështirë, por ne nuk kemi asnjë dyshim se do të fitojmë”.
• Rusia nuk po planifikon të mbyllë në mënyrë proaktive ambasadat në Europë në përgjigje të masave jomiqësore nga Perëndimi dhe zgjerimit të sanksioneve kundër Moskës, tha agjensia e lajmeve RIA, duke cituar një zëvendësministër të Jashtëm.
• Ministria e mbrojtjes e Ukrainës tha se forcat ruse të mbështetura nga tanke dhe artileri po kryenin “operacione stuhie” në fabrikën e çelikut Azovstal në Mariupol, ku janë strehuar mbrojtësit e fundit të qytetit.
• Në Odesa, porti kryesor i Detit të Zi për eksportin e produkteve bujqësore, një person u vra dhe pesë u plagosën kur shtatë raketa goditën një qendër tregtare dhe një depo, thanë forcat e armatosura të Ukrainës në Facebook.
• Sirenat dhe raketat e sulmit ajror ndërprenë një takim midis Presidentit të Këshillit Evropian Charles Michel, i cili po vizitonte Odesa-n dhe kryeministrit ukrainas Denys Shmyhal, duke i detyruar ata të futeshin në një strehë për bomba.
• Zelenski i kërkoi komunitetit ndërkombëtar për hapa të menjëhershëm për t’i dhënë fund bllokadës ruse të porteve të Ukrainës dhe lejimin e eksporteve të grurit.

LEXONI GJITHASHTU

• Ekonomia e Ukrainës humbet 170 milionë dollarë në ditë

• Putin akuzon Perëndimin se ka planifikuar pushtimin e tokave ruse