Debate në Kuvend për Reformën Territoriale, Balla: Reflektoni, Boçi: Nuk jemi noterët tuaj

Kuvendi i Shqipërisë është përfshirë sot në debate të forta lidhur me Reformën Territoriale. Gjatë seancës plenare ka folur kreu i grupit parlamentar të PS-së, Taulant Balla, ndërsa replika të ashpra janë shkëmbyer me nënkryetarin e Partisë Demokratike, njëkohësisht deputetin Luciano Boçi.

Diskutimet u përqendruan te funksionimi i Komisionit të Reformës Territoriale dhe mënyra e marrjes së vendimeve, me palët që akuzuan njëra-tjetrën për shkelje të procedurave dhe imponim të shumicës.

Në fjalën e tij, Taulant Balla iu drejtua anëtarëve të opozitës në komision, duke lënë të hapur mundësinë e reflektimit nga ana e tyre:

“Presim deri në fund të votimit, nëse do të reflektoni dhe do të ktheheni në mbledhje, nuk e votojmë ndryshimin e përbërjes së komisionit, në të kundërt marrim drejtimin dhe shumicën e anëtarëve.”

Nga ana tjetër, Luciano Boçi kundërshtoi vlefshmërinë e mbledhjeve të zhvilluara, duke theksuar se procedurat nuk janë respektuar:

“Nuk ka pasur mbledhje të vlefshme që ju të përcaktoni prezencën. Mbledhjet thirren nga të dy bashkëkryetarët.”

Debati vijoi më tej, teksa Boçi akuzoi maxhorancën për mënyrën se si është realizuar reforma territoriale dhe paralajmëroi reagim politik dhe qytetar:

“Noterët tuaj jemi ne? E bëtë copë Shqipërinë me reformën territoriale. I themi qytetarëve, ne do jemi në shesh, ne do japim opsionin tonë, por jo me ju, jo me shumicën e imponuar nga ju. Me ju çfarë nuk shihet, çfarë nuk dëgjohet.”