“Dëbime masive të emigrantëve”, Premtimi i Trump për haitianët që ‘hanë kafshë’

Donald Trump ka deklaruar se do të dëbojë në masë emigrantët në qytetin e vogël të Ohajos, që sipas tij është tronditur nga fluksi i haitianëve që po hanë kafshët e shtëpisë të banorëve vendas.

“Do të fillojmë me qytetin e Springfilldit, që është shkatërruar nga emigracioni”, ka deklaruar Trump.

Autoritetet vendore të qytetit thanë se pretendimet e pakonfirmuara të ish-presidentit për ngrënien e kafshëve shtëpiake ka tronditur komunitetin dhe ka çuar në mbylljen e shkollave si pasojë e kërcënimeve.

Lidhur me deklaratën e kandidatit republikan reagoi edhe presidenti Joe Biden, i cili i quajti të “gabuara” kritikat në dëm të haitianëve. “Këto që po bën ai duhet të marrin fund”, tha Biden duke iu referuar deklaratave të Trump.

Deklaratat për ngrënien e kafshëve, të cilat Trump i përsëriti në debatin e së martës me Kamala Harris, janë mohuar nga shefi i policisë dhe kryebashkiaku i Springfilldit, si dhe nga guvernatori i shtetit të Ohajos, Mike De Wine.

Gjatë një konference për shtyp të mbajtur të premten në Los Anxheles, Trump u pyet nga gazetarët nëse kishte ndërmend ta vizitonte qytezën.

“Mund të them se ne do të bëjmë dëbime masive nga Springfilldi, shumë masive. Do t’i nxjerrim jashtë nga vendi këta njerëz, do t’i kthejmë në Venezuelë”, tha Trump.

Emigrantët në Springfilld janë kryesisht nga Haiti dhe kanë leje të ligjshme qëndrimi në Shtetet e Bashkuara, në bazë të programit federal për haitianët.

Ende nuk dihet përse në deklaratën e tij Trump përmendi Venezuelën, por dyshohet se ai i referohet një fluksi të emigrantëve nga ky vend në qytetin Aurora të Kolorados.

“Dhe dëbimet do të fillojnë edhe atje nëse fitoj garën presidenciale të nëntorit”, shtoi Trump.

LEXONI GJITHASHTU:

• Deklaratat e Trump për energjinë, Gjermania i përgjigjet kandidatit për president
• Ish drejtuesi i FBI bën deklaratën e fortë: Trump konsiderohet si një aset rus