Del nga SPAK kryebashkiaku i Kuçovës, ‘kyç gojën’ për mediat. Çfarë deklaroi avokati

Kryebashkiaku i Kuçovës, Kreshnik Hajdari, është paraqitur mëngjesin e kësaj të mërkure pranë Prokurorisë së Posaçme, i shoqëruar nga avokati i tij Theodhori Sollaku.

Pas dy orësh marrje në pyetje në ambientet e SPAK, kryebashkiaku ka lënë godinën e organit të akuzës dhe ka zgjedhur të mos japë asnjë deklaratë për media.

Ka qenë vetëm avokati i tij, Sollaku, i cili dha një deklaratë të shkurtër, për gazetarët, por jo për thirrjen e sotme në SPAK, por për vendimin e KQZ-së ditën e djeshme.

Komisioni Qendror i Zgjedhjeve vendosi të mos i ndërpriste mandatin kryetarit të Bashkisë së Kuçovës, edhe pse prokuroria zbuloi se ai kishte fshehur në formularin e dekriminalizimit një dënim për kalim të paligjshëm të kufirit në Greqi.

“Edhe po ta deklaronte nuk do të kishte asnjë konseguencë”, tha shkurtimisht Çollaku për gazetarët.

Ishte koalicioni ‘Bashkë Fitojmë’ që kërkoi verifikimin e pastërtisë së figurës për Kreshnik Hajdarin nga Komisioni Qendror i Zgjedhjeve, pasi ky i fundit nuk kishte deklaruar një dënim të formës së prerë nga Gjykata e Janinës për kalim të paligjshëm të kufirit në vitin 1999. Për këtë cështje, drejtësia shqiptare iu drejtua asaj greke, ku konfirmoi se Hajdari rezultonte i dënuar. Pas Qerim Ismailajt të Mallakastrës, ky është rasti i dytë që KQZ vendosë për vijimin e mandatit.

LEXONI GJITHASHTU:

• Vijon mandatin kryebashkiaku i Kuçovës, Celibashi: S’ka shkak ligjor për shkarkim
• KQZ nuk shkarkoi kryebashkiakun e Kuçovës, Maliqi: Turp, jeni bandita të shtetit