Dëmtohet argjinatura e Zaranikës, banorët: ky problem ndodh sa herë bie shi

Reshjet e ditëve te fundit kanë rikthyer frikën dhe shqetësimin tek banorët e Zaranikës, në Elbasan. Kjo pasi një pjesë e argjinaturës se këtij përroi, është dëmtuar.

“Ja shihe gjendjen si është këtu, Zaranika ja, do mbyt qytetin të gjithë kjo. Lagjen këtu me 200 e ca familje.”- thotë qytetari.

“Të gjithë po flenë me roje këtu”- shton një tjetër.

“Na ikën ura në bllokohemi fare këtu, duhet vënë dorë urgjentisht”- shprehet zonja.

Nuk është hera e parë që banorët përballen me të tillë problem. Një dëmtim i tillë rrezikon që të çajë shtratin e përroit duke rrezikuar banesat përreth.

“Është shumë problem vëlla me thënë të drejtën, kemi gjithë këto vite, kemi pasur shqetësime”- thotë banori.

“Duhet të ndërhyjë shteti, bashkia, kush e ka në dorë, është shumë e panevojshme”- nënvizon një tjetër.

“Na shqetëson shumë, përderisa nuk është përfunduar tamam, normal, ja ajo nëse do lihet ashtu do fillojë të hajë, akoma të zërë pallatin”

“Thirrja ime e vetme është kjo, t’i bëjnë tamam, t’i rregullojnë siç duhet që edhe ne mos të rrezikohemi.”- shprehet qytetari.

Përroi i Zaranikës është një nga shqetësimet më kryesore në çdo sezon shirash, jo vetëm për banorët që jetojnë përgjatë tij por për të gjithë qytetin.

Banorët thonë që e vetmja zgjidhje është ndërhyrja e plotë në të gjithë shtratin e këtij përroi. Or kjo gjë kërkon fonde, të cilat Bashkia e Elbasanit nuk i ka ne dispozicion. Në këto kushte banorëve u mbetet vetëm të shpresojnë për mot me sa më pak reshje.

LEXONI GJITHASHTU: 

• 300 ha tokë nën ujë nga reshjet në qarkun e Shkodrës, nuk ka përmbytje të banesave
• Rikthehet frika e përmbytjeve, 400 ha tokë nën ujë nga reshjet në qarkun e Shkodrës
• Reshjet e shiut, Ulliri: Kërkesat tona për pastrimin e kanaleve u injoruan