Deputetët respektojnë vendimin e Kushtetueses për mosshkarkimin e Metës

Deputetët e Partisë Socialiste janë shprehur se respektojnë vendimin e Gjykatës Kushtetuese, e cila rrëzoi kërkesën e Kuvendit për shkarkimin e presidentit Ilir Meta.

“Ne nuk ishim në luftë me Ilir Metën dhe as Ilir Meta me ne. Nuk e kam lexuar vendimin e Gjykatës Kushtetuese”, u përgjigj zv. kryeministri Arben Ahmetaj për Euronews Albania, i pyetur lidhur me vendimin e një ditë më parë.

Deputeti Erion Braçe, pavarësisht se e cilësoi të ligjshëm vendimin e gjykatës, kishte edhe një kërkesë për presidentin.

“Vendimi i gjykatës është për t’u zbatuar, pres nga Ilir Meta të dalë dhe t’i kërkoj ndjesë të gjithë atyre që ka sulmuar gjatë gjithë kësaj kohe”, tha deputeti socialist.

Ndërkohë kreu i PD Lulzim Basha refuzoi të jepte një përgjigje, duke u shprehur se ‘vendimet e gjykatës nuk komentohen’.

Sipas Gjykatës Kushtetuese, faktet e paraqitura nga Kuvendi për shkarkimin e presidentit nuk përbëjnë shkelje të rëndë të Kushtetutës.

Kushtetuesja hodhi poshtë pretendimet se Meta nuk ka përfaqësuar unitetin e popullit, se ka cenuar marrëdhëniet me partnerët strategjik apo ka cenuar sigurinë publike dhe të pavarësinë e organeve publike.

Vendimi i Kushtetueses e lë në detyrë Presidentin Meta deri në fund të mandatit të tij zyrtar, më 24 korrik 2022.

LEXONI GJITHASHTU:

• Gjykata Kushtetuese rrëzon shkarkimin e Metës
• A do ta lirojë zyrën nëse shkarkohet? Meta i përgjigjet Euronews Albania