Deputeti në Kosovë i kërkon ndihmë Donald Trump për zgjidhjen e krizës politike

Deputeti i Aleancës për Ardhmërinë e Kosovës, Bekë Berisha, ka kërkuar ndihmën e presidentit amerikan, Donald Trump, për zgjidhjen e ngërçit politik në Kosovë.

Pas dështimit për herë të tetë të konstituimit të Kuvendit të Kosovës, Berisha deklaroi se liderët politikë në vend nuk janë mësuar t’i zgjidhin vetë situatat politike, ndaj është e nevojshme që, siç tha ai, “të vijë dikush dhe t’i kapë për krah” për të zgjidhur bllokadën institucionale.

Duke përdorur një ton ironik, Berisha kërkoi nga kryetari i Prishtinës, Përparim Rama, që një shesh në kryeqytet të emërtohet me emrin e presidentit amerikan Donald Trump, në mënyrë që, sipas tij, të rritet angazhimi ndërkombëtar dhe miqtë e Kosovës të mos e harrojnë vendin.

“Po shihet se kjo nuk po mbaron dhe si duket këta liderët politikë i kanë mësuar me i kap për krah, se ashtu duhet me bërë. Ne jemi të shqetësuar për këtë situatë dhe normalisht që po bisedojmë me Grupin Parlamentar. Ne e kemi një propozim si grup parlamentar: mendojmë dhe kërkojmë nga kryetari i Prishtinës, Përparim Rama, që ta zgjedhë një shesh në Prishtinë dhe t’ia vë emrin e presidentit Trump, në mënyrë që të angazhohen edhe të mos na harrojnë edhe miqtë, sepse na kanë harruar dhe nuk po merret askush me neve. Si duket ne nuk jemi të zot ta zgjidhim asnjë situatë politike në Kosovë,” deklaroi ai.

Të martën, Kuvendi i Kosovës dështoi për herë të tetë të konstituohej. Kandidatja e propozuar nga Lëvizja Vetëvendosje, Albulena Haxhiu, nuk arriti të sigurojë 61 votat e nevojshme për t’u zgjedhur kryetare e Kuvendit, në përpjekjen e saj të gjashtë për këtë post.

LEXONI GJITHASHTU:

• Kuvendi i Kosovës dështon për herë të shtatë konstituimin, refuzohet Haxhiu
• Thellohet kriza politike në Kosovë, LVV dështon për zgjedhjen e kryeparlamentarit