Derbi i Madoninës pa fitues, Çalhanoglu shpëtimtari i Interit

Derbi i Milanos mbyllet në barazim 1-1, golat u shënuan nga Abraham dhe Çalhanoglu.

Derbi i Milanos nuk ka prodhuar fitues në ndeshjen e parë, ndërsa kualifikimi do të vuloset në duelin e kthimit. Milani kaloi i pari në avantazh me Abrahamin, por zikaltrit barazuan me turkun Çalhanoglu.

Interi ka regjistruar një tjetër ndeshje pa fitore ndaj rivalëve historikë të qytetit, Milanit, ku përballja e katërt sezonale është mbyllur në një barazim 1-1. Gjithçka mbetet e hapur sa i përket çështjes së kualifikimit, ku gjithçka do të vendoset në duelin e kthimit. Me disa ndryshime në formacion, të dyja ekipet u përpoqën të merrnin fitoren, por në fund barazimi 1-1 i shkon më shumë për shtat zikaltërve, të cilët provuan rotacionin për faktin se në Champions i pret një duel tejet i vështirë përballë Bayernit.

Pjesa e parë ishte e ekuilibruar në lojë dhe rezultat, teksa u mbyll me rrjeta të paprekura, ndërsa të dy golat erdhën në fraksionin tjetër. Abrahami kaloi përpara kuqezinjtë sapo nisi pjesa e dytë, por ky avantazh zgjati vetëm 20 minuta, pasi Çalhanoglu realizoi pas një gjuajtjeje të bukur nga distanca për të rikthyer ekuilibrat.

Zëvendësimet e kryera nga Conceição nuk sollën ndryshim të shifrave, duke bërë që gjithçka të mbyllet në paqe, por jo për shumë kohë. Kjo për faktin se vetëm një prej skuadrave mund të kalojë në finalen e Kupës së Italisë, trofe që shihet me më shumë prioritet nga Milani, ashtu siç edhe trajneri e ka konsideruar shpëtimin e sezonit.

LEXONI GJITHASHTU:

• Ndeshja me Anglinë, Asllani: Te Interi tallen, thonë se Shqipëria do pësojë 6-7 gola
• Bolonja këmbëngul për Asllanin, Interi mendon shkëmbimin shqiptaro-argjentinas