Dërgohet në laboratorin digjital të SPAK telefoni që Laert Haxhiu përdorte në burg

Pas sekuestrimit të celularit të Laert Haxhiut në burgun e sigurisë së lartë në Drenovë, aparati është dërguar menjëherë në laboratorin digjital të Prokurorisë së Posaçme, ku pritet të analizohen të dhënat dhe komunikimet e mundshme të “të fortit” të Lushnjës.

Laert Haxhiu është dënuar me burgim të përjetshëm për “Masakrën e Lushnjës”, ndërsa pas ekstradimit nga Greqia, ai do të përballet edhe me një proces të veçantë gjyqësor si drejtues i një grupi të strukturuar kriminal, i cili dyshohet se ka qenë i përfshirë në të paktën 17 ngjarje të rënda në vend. Këto ngjarje janë rrëfyer nga bashkëpunëtori i drejtësisë, Artan Tafani.

SPAK dyshon se gjatë qëndrimit në burgun e Drenovës, Haxhiu ka ruajtur kontakte me persona të përfshirë në botën e krimit, duke vijuar aktivitetin kriminal edhe nga qelia. Ky dyshim ka shtuar kërkesat për masa më të rrepta sigurie ndaj tij, përfshirë mundësinë e izolimit në regjimin special “41-bis”.

Hetimet vazhdojnë, ndërsa ekspertët e laboratorit digjital pritet të zbërthejnë të gjitha të dhënat e mundshme nga celulari i sekuestruar, që mund të hedhin dritë mbi komunikimet, urdhrat apo bashkëpunimet e mundshme që Haxhiu ka pasur nga brenda burgut.

LEXONI GJITHASHTU:

• “Të gjithë i rrinin pinc Laertit”- Tafani: Si pranova vrasjen e parë, dhanë 50 mijë€
• Tafani rrëfen vrasjen e Çajupit: Ngatërrova rrugën, rashë në ferra kur erdhi policia