Dështon seanca për dëshminë e Erjon Alibej në GJKKO, munguan tre avokatë

Seanca e parashikuar për këtë të martë në Gjykatën e Posaçme kundër Korrupsionit dhe Krimit të Organizuar, ku do të vijonte dëshmia e të penduarit të drejtësisë Erjon Alibej, është shtyrë për shkak të mungesës së tre avokatëve mbrojtës.

Përballë kësaj situate, Prokuroria kërkoi marrjen e masave administrative ndaj avokatëve, duke i konsideruar mungesat e tyre të pajustifikuara dhe si pengesë për vijimin e procesit gjyqësor. Seanca e radhës është caktuar për të enjten, më 5 qershor.

Erjon Alibej, i konsideruar kreu i një prej organizatave kriminale më të njohura në Elbasan, është i akuzuar për trafik ndërkombëtar droge dhe porositje atentatesh për motive hakmarrjeje. Ai ka pranuar të bashkëpunojë me drejtësinë dhe javën e kaluar nisi rrëfimin para trupës gjykuese, ku foli për përfshirjen e tij në trafikun e kokainës dhe për lidhjet me figura të botës së krimit.

Në dëshminë e dhënë, Alibej përmendi përplasjet e tij me vëllezërit Franc dhe Hajdar Çopja, si dhe Suel Çelën, me të cilët më herët kishte pasur marrëdhënie miqësore. Ai i akuzoi dy vëllezërit Çopja si të përfshirë në vrasjen e vëllait të tij, Endrit Alibej, në ngjarjen e njohur si “Masakra e Bradasheshit” të ndodhur në vitin 2020, ku humbën jetën edhe Arben Dylgjeri dhe shtetasi turk Erdal Durunay.

LEXONI GJITHASHTU:

• “Betohem në Kuran, ta fal gjakun” Alibej dëshmon në GJKKO, zbulon bisedat me Dumanin
• Bandat e Elbasanit dhe tregu i kokainës, dëshmon Alibej: Si nisi përplasja me Çopjat