“Detyrimi më absolut i PD”, Berisha: Betejë për të vërtetuar shkeljet zgjedhore

Kryetari i Partisë Demokratike Sali Berisha tha në një konferencë për media nga selia blu se detyrimi më absolut i PD është vërtetimi i të gjitha shkeljeve të rënda ligjore të procesit zgjedhor.

Teksa komentoi vendimin e një dite më parë të Kolegjit Zgjedhor që rrëzoi ankimin e PD për zgjedhjet e 11 majit, Berisha u shpreh se beteja do vazhdojë në të gjitha frontet.

“Nuk ka njeri në Shqipëri që nuk e di se sistemi i drejtësisë në Shqipëri ndodhet në kontroll të plotë të Ramaduros. Por kjo nuk do thotë që ne të mos ndjekim procedurën.

Nga qindra vendime dhe ne do e japim shifrën, 99.9 për qind të tyre, që nga 20 marsi gjer sot, janë dhënë kundër opozitës dhe pro narkopartisë së shtetit.

Ne nuk kemi iluzione, por ne, thashë, betejën do e bëjmë në të gjitha frontet.

Natyrisht e them këtu, dokumentimi, vërtetimi i të gjitha shkeljeve të rënda ligjore të procesit zgjedhor, i të gjitha mekanizmave të shndërrimit të tij në një farsë, është detyrimi më absolut i PD-së para demokratëve shqiptarëve, para zgjedhësve shqiptarë.

E kundërta do të ishte një bashkëpunim në krim monstruoz elektoral, do të ishte një akt i pafalshëm që do bënte këtë forcë politike bashkëfajtore në farsën elektorale të vendit”, tha Berisha.

LEXONI GJITHASHTU:

• Berisha: Rroga minimale nuk rritet, me këto ritme do shpërthejë morri dhe zgjebja
• Berisha reagon mbi akuzat e Trump ndaj Sorosit: Akt historik, ja pse e mbështes