Dhjetë deputetët e dorëhequr të Listës Serbe do të marrin paga edhe për 1 vit

Dhjetë deputetët e Listës Serbe që kanë dorëzuar dorëheqjet në Kuvendin e Kosovës më 7 nëntor, do të vazhdojnë të marrin pagat e tyre nga parlamenti edhe për një vit.

Por kjo nuk vlen për rreth 600 zyrtarët policorë serbë që dorëzuan detyrën e tyre në fillim të këtij muaj.

Paga bazë e deputetit është 1 mijë e 547 euro apo 18 mijë 564 euro në vit. Dhjetë deputetët e dorëhequr serbë do marrin nga buxheti i Kuvendit, 185 mijë e 640 euro për një vit.

Po ashtu, edhe deputetët e rinj të këtij subjekti politik serb të cilët u betuan në seancën e të enjtes, do të marrin pagat e plota, pavarësisht politikave që i ndjekin në raport me prezencën e tyre në parlament.

Dorëheqjet e deputetëve si dhe shumë zyrtarëve tjerë serbë në institucionet e Kosovës, kanë nisur në fillim të nëntorit, në shenjë pakënaqësie me vendimin e Qeverisë së Kosovës për të zbatuar planin prej tri fazash për riregjistrimin e makinave me targa të paligjshme serbe.

Komuniteti serb, si më i madhi në mesin e komuniteteve pakicë në Kosovë, i ka të garantuara me Kushtetutë dhjetë vende në Kuvendin e Kosovës, i cili ka gjithsej 120.

LEXONI GJITHASHTU

• Lista Serbe kthehet në Kuvend, analistët e cilësojnë fitore të Albin Kurtit

• Detaje nga sulmi në veri të Kosovës, dëshmitari: Serbët na goditën
• Dhunohet nga serbët operatori shqiptar në Mitrovicë, dërgohet në spital