Dhjetëra të lënduar në kampin e MEK, reagon Ministria e Brendshme

Ministria e Brendshme ka reaguar në lidhje me tensionet e ndodhura gjatë ditës së sotme në kampin e muxhahedinëve në Manzë të Durrësit.

Në njoftim e ministrisë theksohet se operacioni i policisë është zhvilluar konform ligjit pas urdhrit të SPAK dhe miratimit nga Gjykata e Posaçme.

Sipas Ministrisë së Brendshme, banorët kanë bërë rezistencë dhe janë konfrontuar me uniformat e policisë për të ndaluar kontrollet.

MB mohon të ketë humbje jete apo të plagosur gjatë operacionit dhe thekson se po bën të gjitha verifikimet e nevojshme për pretendimet se në morgun e spitalit, në MEK, ndodhet një person i vdekur.

“Operacioni i sotëm i Policisë së Shtetit në vendqëndrimin e MEK në Manëz të Durrësit është në zbatim të plotë të urdhrit të SPAK dhe vendimit të Gjykatës së Posaçme kundër Korrupsionit dhe Krimit të Organizuar.

Vendimi i Gjykatës është pasojë e veprimeve që bien haptazi ndesh me marrëveshjen dhe angazhimet e marra nga grupimi MEK prej vitit 2014, kur u vendosën në Shqipëri vetëm për qëllime humanitare. Fatkeqësisht ky grupim nuk i është përmbajtur këtyre angazhimeve duke thyer marrëveshjen. Ndërhyrja e Policisë së Shtetit ka qënë konform ligjit dhe në zbatim korrekt të procedurave që kërkojnë operacione të tilla. Veprimet e Policisë së Shtetit për zbatimin e ligjit janë kryer si në çdo pjesë tjetër të territorit të Republikës së Shqipërisë.

Fatkeqësisht brenda kampit ka pasur rezistencë ndaj kryerjes së punës së Policisë së Shtetit, çka bie ndesh me kuadrin procedural të zbatimit të ligjit. Bazuar në të dhënat e Policisë së Shtetit, gjatë operacionit nuk ka pasur humbje jete dhe as të lënduar. Për çdo pretendim për humbje jete, në spitalin e vendqëndrimit të tyre po bëhen të gjitha verifikimet proceduriale”, njofton Ministria e Brendshme.

LEXONI GJITHASHTU: 

• Vdekja e 1 muxhahedinit gjatë operacionit në MEK, burime nga politika: I ra infarkt
• Kontrollet e policisë në MEK, muxhahedini i larguar nga kampi: Policia ka të drejtë