Dhunonte bashkëjetuesen dhe e kërcënonte me jetë, arrestohet 65-vjeçari në Shkodër

Një 65 vjeçar në Shkodër është vënë në pranga pasi dhunonte vazhdimisht bashkëjetuesen. Sipas njoftimit të policisë, 65-vjeçari ushtronte dhunë ndaj saj në prani të fëmijës së tyre të mitur dhe i kërcënonte të dy për jetën.

Gjatë kontrolleve në banesë policia i ka sekuestruar një armë gjahu, që ky shtetas e posedonte pa leje, në banesë.

Njoftimi i policisë:

Shërbimet e Komisariatit të Policisë Shkodër, pas marrjes së njoftimit nga një shtetase, se bashkëjetuesi i saj e kishte dhunuar vazhdimisht dhe e kishte kanosur për jetën, kanë ndërhyrë menjëherë për kapjen e këtij shtetasi.

Si rezultat i veprimeve të shpejta, është arrestuar në flagrancë shtetasi shtetasi M. Gj., 65 vjeç.

Gjatë kontrollit në banesë, shërbimet e Policisë kanë gjetur dhe sekuestruar një armë gjahu, që ky shtetas e mbante pa leje.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.