“Dhunuesi je ti”, nisma që filloi në Kili mbërrin edhe në Tiranë

Nisma “Dhunuesi je ti”, një kërcim global lidhur me të drejtat e grave dhe nxjerrjen në pah të dhunës me bazë gjinore ka mbërritur edhe në Shqipëri.

Nisma vjen e frymëzuar nga manifestimi i guximshëm i grave në Kili, të cilat zgjodhën ta kundërshtojnë dhunën shtetërore të ushtruar ndaj tyre. Kërcimi “Dhunuesi je ti” shoqëruar nga himni i përshtatur në gjuhën shqipe është një formë proteste sjellë edhe në vendin tonë nga gra dhe vajza.

“Raste të tilla ekzistojnë pafund kudo në botë, ekzistojnë edhe në vendin tonë pavarësisht se nuk janë publike, pavarësisht se nuk merren masa as nga policia”, – tha aktivistja Albina Ruko.

Sipas tyre, për ta ndryshuar situatën e dhunës edhe në vendin tonë, gratë dhe vajzat duhet të bashkohen kolektivisht, për të denoncuar padrejtësitë shtetërore ndaj tyre.

“Asnjë vajza dhe grua në Republikën e Shqipërisë nuk do duhet të pranojë shtypjen, nuk do duhet të pranojë dhunën dhe do duhet të ngre zërin kundër saj.”- u shpreh aktivistja Liri Kuçi.

Nisma u soll në Tiranë nga lëvizja “Organizata Politike” së bashku me aktivistët në mbrojtje të drejtave të vajzave dhe grave.