Digjet një makinë në Fushë-Krujë, dyshohet se është e autorëve të atentatit në Rinas

Pas atentatit me armë zjarri të ndodhur pasditen e kësa të marte në afërsi të aeroportit të Rinasit, është gjetur një automjet i djegur në fshatin Halil të Fushë-Krujës.

Sipas burimeve nga vendngjarja, mjeti është përfshirë plotësisht nga flakët dhe dyshohet se mund të jetë përdorur nga autorët e atentatit të ndodhur në rrethrrotullimin që të çon drejt terminalit të pasagjerëve në Rinas.

“Shërbimet e Policisë, gjatë kontrollit të zonës, në fshatin Halil, kanë konstatuar duke u djegur një automjet tip “Toyota”, që dyshohet se është përdorur nga autorët e ngjarjes së ndodhur në Rinas.

Në automjet janë konstatuar 4 armë zjarri që dyshohet se janë përdorur në këtë ngjarje.

Armët do të dërgohen në Institutin e Policisë Shkencore”, njofton policia.

Nga informacionet paraprake, është qëlluar me armë zjarri në drejtim të një “Benz”-i luksoz me targa AB 099 UO, ku ndodheshin një person që mbeti i vrarë dhe një tjetër i plagosur.

Nga burime thuhet se viktima është miku i Shullazit, Gilmando Dani ndërsa i plagosuri është Muçi Shaljani (Sheqeri).

Pas atentatit, autorët janë larguar në drejtim të Fushë-Krujës, ndërsa pak minuta më vonë është raportuar për makinën që po digjej në fshatin Halil.

Forcat e policisë kanë rrethuar zonën dhe po kryejnë hetime në vendin ku u gjet mjeti i djegur, me qëllim identifikimin e pronësisë së tij dhe mbledhjen e provave që mund të çojnë në zbardhjen e ngjarjes.

Ndërkohë, grupi hetimor po vijon punën për të përcaktuar nëse mjeti i djegur është përdorur nga autorët e atentatit dhe për të rindërtuar itinerarin e tyre pas krimit.

LEXONI GJITHASHTU:

• Momenti pas atentatit në Rinas, policia thyen xhamin për të nxjerrë personat
• Të shtëna me armë zjarri tek rrethrrotullimi i Rinasit, vritet një person