Dita Botërore e Librit, Universiteti i Tiranës me veprimtari akademike dhe kulturore

Në Ditën Botërore të Librit dhe të Drejtës së Autorit, Universiteti i Tiranës ka organizuar veprimtari akademike dhe kulturore në Fakultetin e Historisë dhe të Filologjisë.

Në çdo auditor janë zhvilluar prezantime të botimeve më të fundit, diskutime shkencore dhe forume ku të pranishëm ishin studiues, pedagogë dhe studentë të fushave të ndryshme.

“Një nga ditët e bukura dhe tashmë tradicionale të fakultetit tonë në kremtimin e 23-prillit si ditën botërore të librit dhe të së drejtës së autorit. Libri studimor, kontributet që vijnë përmes studimeve, përmbledhjeve gjejnë hapësirën e tyre për t’u promovuar”, u shpreh Persida Asllani

Në diskutim u theksua nevoja për një riorganizim të instituteve dhe strukturave akademike, ndërsa akademiku Artan Fuga nënvizoi rëndësinë e krijimit të departamenteve dhe instituteve ndërdisiplinare.

“Tematizoni institutet, punoni me temat dhe projektet dhe jo me ekipe që sa fillon del në pension, është i njëjti grup në të njëjtin institucion. Sigurisht ka vend të krijohen departamente ndërdisiplinare, institute mësimëdhënie ndërdisiplinare si dhe institute të kësaj natyre”, tha Akademiku Arta Fuga.

Gjithashtu u bënë prezantime të botimeve të departamentit dhe bashkëpunëtorëve të tij. Fakulteti i Historisë dhe i Filologjisë të Universitetit të Tiranës organizoi edhe edicionin e 17-të Panairit të Librit në mjediset e jashtme të këtij fakulteti.

Ky 23 prill shënon vitin e 30-të të Ditës Botërore të Librit. Kjo datë është shpallur si Dita Botërore e Librit më 15 nëntor të 1995, me një rezolutë të UNESCO-s, pasi u morën në konsideratë faktet se libri ka qenë, historikisht, instrumenti më i fuqishëm i shpërndarjes së njohurive dhe mjeti më efikas për të siguruar ruajtjen e këtyre njohurive.

LEXONI GJITHASHTU:

• INSTAT: Familjet shqiptare investojnë më shumë në arsimimin e fëmijëve
• Dhimbjet kronike të veshit, Mjekja: Duhet të trajtohet, sjellë probleme serioze