Dita e dhjetë e bojkotit të avokatëve kundër hartës së re gjyqësore

Sot është dita e dhjetë e bojkotit të avokatëve në qarkun e Korçës, të cilët janë pozicionuar kundër hartës së re gjyqësore. Po ashtu, dhoma e avokatisë Korçë përshkallëzoi bojkotin duke mos marrë pjesë në masat e sigurisë në datat 24-25.

Ditën e sotme pritet të mbahet takimi i kësaj dhome, në 12:00, për të vendosur në qoftë se do të ketë një dorëzim nga ana e avokatëve apo do të vazhdohet me bojkotin.

Ndërkohë avokatët e Vlorës, përveç seancave rutinë të parashikuara nga gjykata, do të bojkotojnë edhe masat e sigurisë më 27, 28 dhe 29 qershor. Gjatë këtyre ditëve pritet të dështojnë 316 seanca në total. Protestës së avokatëve në Vlorë i janë bashkuar edhe qytetarë, ndërkohë që priten edhe reagime nga deputetët e Vlorës.

E njëjta situatë bojkoti është edhe në qytetin e Durrësit, ku avokatët gjatë datave 27 deri më 29 qershor do të bojkotojnë seancat gjyqësore, masat e sigurimit, si dhe nuk do të marrin pjesë në veprimet hetimore dhe shfuqizimin e listave kryesisht.

LEXONI GJITHASHTU:

• Bojkoti i avokatëve, pas Korçës, Vlora e Durrësi braktisin masat e sigurimit
• Sot nis bojkoti i seancave për masat e sigurisë nga avokatët në Korçë