Dita e gjashtë nën flakë, përkeqësohet situata me zjarret në Finiq

Dita e gjashtë sot që disa fshatra në bashkinë Finiq vijojnë të jenë nën pushtetin e zjarrit. Edhe sot situata vijon të përkeqësohet me ritme alarmante.

Zjarri nisi në mal në Dhrovjan dhe ka kaluar fshat pas fshati duke lënë pas gjurmë të dukshme nga djegia. Mbrëmjen e së shtunës dhe gjatë gjithë natës të së dielës është luftuar në fshatrat Livinë, Krongj, Velahovë, dhe sot edhe në fshatin Ardhasovë.

Në fshatin Krongj është djegur vetëm Kisha e fshatit, ndërsa janë evakuuar banorët. Ndërsa  në fshatin Livinë dhe Velahovë janë djegur disa shtëpi.

Zjarri po përhapet me shpejtësi për shkak edhe të erës dhe temperaturave të larta.

Forcat zjarrfikëse të Finiqit, Sarandës, Konispolit dhe Delvinës, ndodhen në terren dhe po punojnë në kushte tepër të vështira për të vënë nën kontroll vatrat aktive, ndërsa është kërkuar ndërhyrje shtesë nga forcat qendrore dhe tjetër ndihmë nga ajri.

LEXONI GJITHASHTU:

• Situata e zjarreve në monitorim: Vatrat e zjarrit janë aktive në 7 qarqe të vendit
• Zjarret në vend: Situatë problematike, evakuohen banorët e fshatit Dhivër në Finiq