Djegia e Kuranit trazon botën, Myftiu: Ku digjen libra, nesër digjen njerëz

Një aktivist i një partie anti-islamiste dogji Kuranin gjatë një proteste, duke shkaktuar debat dhe trazira në Suedi. Të shumta kanë qenë protestat e myslimanëve ditët e fundit në vendin nordik, ndërkohë që debati është shtrirë në gjithë globin.

Myftiu i Korçës tregon se të tilla situata mund të përshkallëzojnë deri aty ku mund të ndodhë një holokaust i dytë, këtë herë ndaj myslimanëve.

“Ato që më shqetësojnë janë fjalët e një poeti i cili tregon se aty ku sot digjen libra, nesër do të digjen njerëz. Më kujton momentet e Holokaustit, ku çdo gjë nisi me një situatë të tillë dhe përfundoi me holokaustin famëkeq; dhe po kështu, në qoftë se bëjmë një paralelizëm momentet kur nuk reagohet ndaj djegies së kuranit, nesër mund të dalin pasoja akoma më të mëdha, mund të ndodhë holokausti i dikurshëm me Islamofobinë”- tha Imami i Korçës, Ledian Cikalleshi.

Kleriku mysliman e dënon gjuhën e njëjtë të dhunës dhe barbarive, duke kundërshtuar protestat e dhunshme apo djegien e librave të besimeve të tjera fetare nga myslimanët.

“Ne si myslimanë nuk mund të reagojmë me të njëjtën mënyrë. Bibla është me relevant hyjnor, është e ardhur nga Zoti e ne nuk mund të reagojmë në të njëjtën formë nëse duam të protestojmë apo reagojmë në të njëjtën formë. Kjo akumulon mllef të panevojshëm”- shtoi ndër të tjera ai.

Ai shkon më tutje duke thënë se problemet që Suedia ka me Turqinë nuk mund dhe nuk duhet të përfshijnë gjithë interesat e myslimanëve të globit.

“Problematika politike që kanë në këto momente, ne duam të jenë pjesë e NATOS sa më shpejt, siç jemi ne. Por një shtet i caktuar, sado i fuqishëm dhe i madh të jetë, nuk mund të përfaqësojë gjithë myslimanët.”- thekson ai.

Sipas drejtuesve të besimeve të ndryshme fetare në Shqipëri, notat e urrejtjes fetare në vendin tonë janë të ulëta, për shkak edhe të harmonisë që karakterizon vendin ku ne jetojmë.

LEXONI GJITHASHTU: 

• Tabaku: Qeveria shqiptare i ka dhënë koncesione kompanive të sanksionuara nga SHBA
• Afera e inceneratorëve, Monika Kryemadhi thirret në SPAK