“Do justifikoj besimin e votuesve”, Putin: Rusia në epokë historike

Në një fjalim televiziv drejtuar kombit pas shpalljes së rezultateve zyrtare të zgjedhjeve, presidenti rus Vladimir Putin është zotuar se do ta justifikojë besimin e dhënë nga votuesit.

Sipas agjencisë së lajmeve “Tass”, Putin ka premtuar se do të përdorë të gjitha propozimet konstruktive të kandidatëve të tjerë për president dhe se do të bëjë gjithçka që është në pushtetin e tij për të justifikuar besimin qytetar.

“Rusia po ecën në një shteg historik, me besimin tek forcat e saj dhe tek e ardhmja”, ka thënë më tej Putin.

Më herët, zëdhënësi i tij Dmitry Peskov deklaroi se, dërgimi i trupave ushtarake të NATO-s në Ukrainë do të ketë pasoja të rënda.

“Një lëvizje e tillë mund të çojë në pasoja shumë të dëmshme dhe madje të pariparueshme”, ka thënë Peskov.

Zëdhënësi i Kremlinit ka shtuar më tej se, Rusia do të përdorë të gjitha mekanizmat ligjore dhe do të gjejë mënyra të reja për të reaguar, nëse BE vendos të konfiskojë të ardhurat nga kapitalet e saj në Evropë për t’i dërguar në Kiev.

Sa i takon luftës në Ukrainë, Ministria ruse e Mbrojtjes ka deklaruar se trupat e saj kanë marrë nën kontroll një tjetër qendër të banuar në Donbas, Tonenkoje, pranë qytetit strategjik të Avdivkës.

LEXONI GJITHASHTU:

• Ç’presin rusët| Rizgjedhja e Putin, qytetarët: Asnjë ndryshim, vendi po ecën mirë
• E veja e Navalnyt: Protestat dëshmojnë se Putini është president jo legjitim