Dorëheqja e Zaev dëmton ‘Open Balkan’ shprehen analistët

Analisti, Baton Haxhiu e konsideron dorëheqjen e kryeministrit të Maqedonisë së Veriut, Zoran Zaev “jo për arsye morale”, por për shkak se nuk ka marrë atë që pritej nga Bashkimi Evropian. Sipas tij largimi nuk lidhet me humbjen në zgjedhjet lokale.

“Ka nënshkruar gjëra që nuk nënshkruhen. Nuk nënshkruhet humbja e identitetit për të ushqyer ambicien e Greqisë përmes BE. Kur i bëri këto nuk mori asgjë nga BE sepse i doli kundër Bullgaria që i kërkoi të ndryshojë historinë”, deklaroi ai.

Për Andi Bushatin, dorëheqja e Zaev është një goditje e madhe për Open Balkan pasi opozita në RMV është shprehur kundër.

“Kjo mund të përmbysë raportin dhe katër vende mund të jenë kundër dhe Ballkani i Hapur ngelet vetëm krevati dopio i Ramës dhe Vuçiç”, u shpreh Bushati.

Sipas Baton Haxhiut “Open Balkan” është reduktuar edhe në ide dhe se kjo iniciativë nuk mund të funksionojë pa hapur kufijtë dhe RMV.

“Nuk mund të funksionojë po nuk i hapi kufijtë RMV, do të jetë kohë e vështirë për Open Balkan”, deklaroi analisti.